‘गो कोरोना गो’ साठी कारंजा नगरपालीका ‘युध्द दक्ष’, ‘युध्द सज्ज’

‘गो कोरोना गो’ साठी कारंजा नगरपालीका ‘युध्द दक्ष’, ‘युध्द सज्ज’
स्वत:च्या आणि इतरांच्या आरोग्याचे रक्षण करावे - मुख्याधिकारी डॉ. अजय कुरवाडे
कारंजा (लाड) - जागतीक महामारी घोषीत झालेल्या कोरोनाला भारतातून पळवून लावण्यासाठी २५ मार्चपासून झालेल्या संपूर्ण भारत लॉकडाऊनचा आज आठवा दिवस आहे. या आठ दिवसात भारतीयांनी अदम्य साहस, धैर्य व सहनशिलतेचा परिचय दिला आहे. केंद्र शासन, राज्य शासनाच्या आदेशानुसार महानगरपालीका, नगर पालीका, नगर पंचायत, ग्रामपंचायत स्तरावर विविध आरोग्यविषयक उपाययोजना केल्या जात आहेत. याच धर्तीवर कारंजातील नागरीकांना कोरोना संसर्गापासून वाचविण्यासाठी कारंजा नगरपालीका ‘युध्द सज्ज, युध्द दक्ष’ झाली आहे. मुख्याधिकारी डॉ. अजय कुरवाडे यांनी नगराध्यक्ष शेषराव ढोके,आरोग्य सभापती सलीम गारवे, विविध विभागातील सभापती तसेच नगरसेवक यांचे सहकार्य व मार्गदर्शनात आरेाग्यविषयक रणनिती आखून शहरातील प्रभागात विविध उपाययोजना सुरु केल्या आहेत. या उपाययोजनेमध्ये रस्ते - गटारींची दैनंदिन सफाई, कचरा उठाव, डास निर्मूलनासाठी औषध फवारणी, अत्याधुनिक जेटींग मशीनव्दारे सोडियम हायपोक्लोराईड सारखे जंतुनाशक फवारून विशेष लक्ष केंद्रित करून निर्जंतुकीकरण करण्यात येत आहे.
 यासोबतच विदेशाासह मुंबई, पुणे आदी कोरोनाचा संसर्ग झालेल्या शहरातून कारंजामध्ये आलेल्यांचा घरोघरी जाऊन शोध घेतला जात असून  यासाठी प्रत्येक प्रभागाकरिता दोन अधिकारी नेमण्यात आले आहेत. महाराष्ट्रातील कोरोना संसर्गित शहरातून कारंजामध्ये आलेल्या नागरिकांची संख्या मोठी आहे. त्यांना आपापल्या घरातच स्वतंत्र राहण्याच्या सूचना प्रशासनाने दिल्या आहेत. परंतु त्यापैकी काही मंडळींकडून त्याचे पालन होत नसल्याचे निदर्शनास आले आहे. अशांसाठी शहरात विविध ठिकाणी सक्तीची विलगीकरण केंद्रे सुरू करण्यात आली आहे. न. प. आरोग्य निरीक्षक विनय वानखडे यांच्या देखरेखीखाली नगरपालिकेतर्फे आरोग्य विभागाच्या कर्मचार्‍यांची आरोग्य तपासणी करवून घेण्यात आली आहे. त्यांना मास्क,सॅनिटायझर, साबण आदी वस्तु पुरविण्यात आल्या आहेत. स्वत:च्या आरोग्याची काळजी घेण्यासंदर्भात त्यांना विशेष सूचना देण्यात आली आहे. कोरोनाचा संसर्ग आणि फैलाव रोखण्यासंदर्भातील आवाहन कचरा गोळा करणार्‍या घंटागाडीवरील लाऊडस्पिकरवरून करण्यात येत असून जनतेकडून सुध्दा प्रतिसाद मिळत आहे. बाहेरून शहरात कुटुंबातील नागरिकांना सक्तीने ’होम क्वारंटाईन’ करण्यात आले आहे.त्या घरातील कचरादेखील स्वतंत्रपणे जमा करून त्याची विल्हेवाट शास्त्रीयपध्दतीने लावली जात आहे.
स्वत:च्या आणि इतरांच्या आरोग्याचे रक्षण करावे - मुख्याधिकारी डॉ. अजय कुरवाडे
 कोरोना विरोधातील लढाईसाठी नगरपालिका आवश्यक ती सर्व काळजी घेत असून नागरिकांनी आपल्या घरातच थांबून संसर्गाव्दारे पसरणा-या या आजाराची साखळी खंडीत करण्यात आपले योगदान द्यावे आणि आपल्या स्वत:च्या आणि इतरांच्या आरोग्याचे रक्षण करावे.