हॅन्डवॉश सेंटर व सॅनिटायझर टनेलची उपलब्धी : कोरोनाच्या मुकाबल्यासाठी कारंजावासी सज्ज

हॅन्डवॉश सेंटर व सॅनिटायझर टनेलची उपलब्धी : कोरोनाच्या मुकाबल्यासाठी कारंजावासी सज्ज
नगर परिषदेची स्वच्छता व निर्जंतुकीकरण मोहीम युद्धपातळीवर
कारंजा (लाड) - कोरोना विषाणूपासून उद्भवणार्‍या नोवेल कोविड-19 या आजारापासून आपल्या शहरवासीयांना वाचविण्यासाठी कारंजा नगर परिषद प्रशासन युध्दपातळीवर सज्ज झाले असून संपूर्ण स्वच्छता आणि निर्जंतुकीकरण मोहीमेनंतर मुख्याधिकारी डॉ. अजय कुरवाडे यांच्या मार्गदर्शनात शहरात तीन मुख्य ठिकाणी हॅन्डवॉश सेंटर आणि मुख्य चौकात सॅनिटायझर टनेल (निर्जंतुकीकरण मशीन) बसविण्यात आले आहेत.
 त्याबरोबरच अत्यावश्यक सेवेत काम करणार्‍या कर्मचार्‍यांना तसेच येणार्‍या नागरिकांना कोरोनाची बाधा होऊ नये म्हणून पालिका प्रशासन युद्ध पातळीवर उपाययोजना करत आहे. या अत्याधुनिक मशीनमध्ये 1000 लिटर पाण्याची टाकी लावून त्यामध्ये पॉलिमेरिक बेक्यूनाइड हैड्रोक्लोराईडचे 0.5 टक्के हे प्रमाण वापरून निर्जंतुकीकरण करण्यात येते. या अत्याधुनिक निर्जंतुकीकरण मशीनमध्ये व्यक्तीने प्रवेश केल्यानंतर सेन्सर कार्यान्वित होऊन स्प्रे सुरू होतो. 10 सेकंदांमध्ये संपूर्ण शरीरावर सॅनिटाझर स्प्रे होऊन व्यक्तीच्या डोक्यापासून पायापर्यंत संपूर्ण शरीर निर्जंतुकीकरण केले जाणार आहे. अत्यावश्यक कामानिमित्त बाहेर येणार्‍या नागरिकांसह अधिकारी व कर्मचारी यांना यामुळे कोणत्याही व्हायरसची बाधा होऊ नये हा मुख्य उद्देशाने हे लावण्यात आले असल्याची माहिती मुख्याधिकारी डॉ. अजय कुरवाडे यांनी दिली.
 शहरातील नागरिकांच्या आरोग्यासाठी नगर परिषद प्रशासन सज्ज असून न.प.आरोग्य निरीक्षक विनय वानखडे यांच्या मार्गदर्शनाखाली आरोग्य विभागातील तसेच कर विभागातील कर्मचारी सतत युद्धपातळीवर कार्य करीत असून नगराध्यक्ष शेषराव ढोके, आरोग्य सभापती सलीम गारवे, सर्व खात्यातील सभापती तसेच नगरसेवक वेळोवेळी या संपूर्ण कार्याचा आढावा घेऊन सूचना देत असल्याची माहिती नगर पालिका प्रशासनाने दिली आहे.