करोनाबाधितासोबत सेल्फी; सहा अधिकारी निलंबित

करोनाबाधितासोबत सेल्फी; सहा अधिकारी निलंबित
कराची: जगात करोनाचा संसर्ग वेगाने फैलावत असल्याचे चित्र आहे. करोनाची बाधा झाल्यामुळे रुग्ण आणि नातेवाईक चिंतेत आहेत. पाकिस्तानमध्येही करोनाचा संसर्ग फैलावत असून एक वेगळंच प्रकरण समोर आले आहे. करोनाबाधितासोबत सेल्फी काढल्याप्रकरणी सहा अधिकाऱ्यांना निलंबित करण्यात आले आहे.
पाकिस्तानमधील माध्यमांनी दिलेल्या वृत्तानुसार, खैरपूर जिल्ह्याचे उपायुक्तांनी वेगवेगळ्या भागातील सहा महसुली अधिकाऱ्यांचे निलंबन केले आहे. या अधिकाऱ्यांनी ज्या अधिकाऱ्यासोबत सेल्फी काढला. त्याला करोनाची बाधा झाली असल्याचे वैद्यकीय चाचणीत समोर आले आहे. हा करोनाबाधित अधिकारी नुकताच इराणहून तीर्थयात्रेवरून परतला होता. जेव्हा सेल्फी घेण्यात आला तेव्हा या अधिकाऱ्यामध्ये करोनाची कोणतीच लक्षणे आढळली नव्हती अथवा त्यानेदेखील काही त्रास होतोय याबाबत काही भाष्य केले नव्हते. हा सेल्फी चांगल्या भावनेतून घेण्यात आला होता. मात्र, हा सेल्फी कोणीतरी सोशल मीडियावर पोस्ट केला. यानंतर काही दिवसांनी या अधिकाऱ्याला करोनाची बाधा झाली असल्याचे समोर आले असल्याची माहिती एका अधिकाऱ्याने दिली. करोनाबाधित अधिकाऱ्यासोबत सेल्फी काढणाऱ्या अधिकाऱ्यांना विलगीकरण कक्षात ठेवण्यात आले आहे.
करोनाचा संसर्ग शेजारच्या पाकिस्तानमध्ये पसरत आहे. पाकिस्तानमध्ये आतापर्यंत ७५० हून अधिक प्रकरणे समोर आली आहेत. पाकिस्तानच्या सिंध प्रांतात १५ दिवसांचा लॉकडाऊन घोषित करण्यात आला आहे. तर, पाकिस्तानमध्ये लॉकडाऊन करता येणार नसल्याचे पंतप्रधान इम्रान खान म्हटले. पाकिस्तानमध्ये २० टक्केपेक्षा लोक दारिद्रय रेषेखालील आहेत. त्यांना याचा मोठा त्रास होऊ शकतो. मात्र, लोकांनी स्वत:हून घरात थांबण्याचे आवाहन खान यांनी केले आहे.